Панфилов ауданы Головацкий ауылында 210 орындық жаңа бөбекжай балабақшасы іске кіріскелі бір айға жуықтаған. Бұл – кәсіпкердің аудан аумағында ашып отырған бесінші балабақшасы. Ол өзінің мектепке дейінгі білім беру нысандарында 700-ден астам баланы қамтып отыр, - деп хабарлайды Жетісу облысы әкімінің баспасөз қызметі.

Кеше Панфилов ауданына жасаған сапары барысында облыс әкімі Бейбіт Исабаев бірқатар нысандарды аралаған болатын. Солардың қатарында Головацкий ауылындағы аталған балабақша да бар.

Аудан басшысының айтуынша, 1986 жылы салынған,  бұған дейін «Қорғас» ШЫХО-ға қарасты болып келген ғимарат кейін ауданның коммуналдық меншігіне берілген. Ауыл тұрғындарының балабақша қажет деген өтінішін ескеріп, биыл ғимарат тендер арқылы балабақша мақсатында пайдалануға ұсынылған. Жеңімпаз боп танылған «Кончибай» ЖШС бүгінде мұнда 210 орындық «Жаскент» бөбекжай балабақшасын ашып отыр.

Балабақша иесі, кәсіпкер Тұрсын Кончибаева – ардагер педагог. Ол ұзақ жыл ұстаздық етіп, балалармен жұмыс істеу тәжірибесін меңгерген маман. Зейнеткерлікке шыққан соң, балабақша ашу ісін қолға алған. Осылайша 10 жылдан бері жекеменшік балабақша ашып, кәсібін жүргізіп келеді. 

- Бірнеше жыл бос тұрған ғимаратты конкурспен 80 млн. теңгеге  ұтып алдым. Алғашында 10 млн. теңгесін құйдым, қалғанын шетінен ай сайын төлеп отырмын. Ғимаратты жөндеу, балабақша жұмысын ұйымдастыру ісіне қазірдің өзінде 220 млн. теңге инвестиция құйдым. Тағы 100 млн. теңге көлемінде қаржыны қажет ететін жұмыстары бар. Бөбекжай балабақша 210 балаға арналған. Ашылғанына 15 күндей болды. Бүгінгі күнге 150 бала қабылдадық, әлі де қабылдаймыз. Осы айдың аяғына дейін 210 орын толады деп жоспарлап отырыз. Көп балалы отбасыларынан он бес баланы тегін қабылдадық. Ана-аналардың балалардың тамақ ақысына төлейтіні 10 мың теңге. Оны көтермейміз. Бұл осы ауданда ашқан бесінші балабақшам. Оларда 700-ден астам бала тәрбиелеп отырмыз. Сұраныс көп, ата-аналар разы, - дейді Т. Кончибаева.

Жалпы ғимараттың аумағы 1600 ш.м. Тоғыз топ бар. Отыз адам жұмыс істейді. 3 мыңнан астам тұрғыны бар ауылда бұған дейін мектеп жанындағы шағын орталық қана болса, енді оған қоса жаңа бөбекжай балабақша ашылғанына ата-аналар да қуанышты.

Жетісу облысы әкімінің баспасөз қызметі.

Фотосуреттер авторы: Жеңіс Ысқабай

Источник: Акимат области Жетісу