Бүгін облыс әкімі Бейбіт Исабаев Талдықорғандағы І.Жансүгіров атындағы Мәдениет сарайында қала тұрғындарымен кездесу өткізді. Алдымен облыс басшысы өңірдің, соның ішінде қаланың әлеуметтік-экономикалық дамуына қатысты мәліметтерді баяндап, жасалған қолдаулар мен алдағы жоспарлар туралы айтты. Қала басшылығының алдына нақты міндеттер жүктеді, - деп хабарлайды Жетісу облысы әкімінің баспасөз қызметі.

Облыс әкімінің баяндауынша, «Талдықорған» индустриялық аймағын ірі инвестициялық жобалармен толтыру мәселесі әлі күнге дейін өзекті болып отыр. Оның аумағында әзірге 6 кәсіпорын жұмыс істеп тұр. Дегенмен қалада шағын және орта бизнес субъектілерінің саны былтырғыға қарағанда 16%-ға өсіп, 17 мыңнан асқан. Онда 39 мыңға жуық адам еңбек етеді.

Жалпы облыста өндірілетін тамақ өнімдерінің 25% Талдықорған қаласының үлесінде. Мұнда ауыл шаруашылығы өнімдерін өңдеу саласында 17 кәсіпорын жұмыс істейді, оның ішінде сүт, нан, мал азығын өндіретін нысандар, құс фабрикасы және т.б. бар.

Баяндамашының сөзіне сүйенсек, «Жетісу Агро кешені» кәсіпорнының көкөніс сақтайтын қоймасы қайтадан жаңғыртылып, 6 мың тоннаға жуық өнім әр түрлі мерзімге сақтауға салынды. Биыл қыс-көктем айларында, маусым аралық қымбаттаушылық кезеңінде олар шектелген бағамен сатылымға шығарылады. Әлеуметтік маңызы бар азық-түлік тауарларының бағасын тұрақтандыру мақсатында 18 азық-түлік тауарын сататын екі шағын әлеуметтік дүкен ашылған, келесі жылғы қаңтарда тағы дүкен іске кіріседі.

Облыс әкімі қаланың инфрақұрылымын дамыту мәселелеріне егжей-тегжейлі тоқталды. Оның айтуынша, қазір қала халқының 90%-ына газға қосылуға мүмкіндік жасалған. Өткен жылы 5 елді мекенге – 3-ші бөлімшеге, Пригородныйға, Ынтымақ ауылына, Экспедиция және 3-ші бөлімшенің жеке тұрғын үй секторына газ тартылды. Биыл табиғи газға Үйтая саяжайы мен Жастар-2 шағын ауданы қосылды. «Бұдан бөлек Ынтымақ тұрғын үй алабындағы құрылыс жұмыстары аяқталып, қазір іске қосып тексеру жүргізіліп жатыр, 2024 жылдың көктемінде газ берілетін болады», - деді Б. Исабаев.

Мойнақта да газ тарту жұмыстары басталды. Қала маңында өзге елді мекендерді газдандырудың ЖСҚ-сын әзірлеуге қаржы бөлінді. Осылайша 2025 жылға қарай қала мен оның маңындағы елді мекендер газбен толық қамтылады. Осы орайда қала әкіміне тұрғындардың газға қосылуын белсенді жүргізу тапсырылды.

Облыс басшысы өз сөзінде «Жастар 1/1» тұрғын үй алабында, «Ұлан» шағын ауданында, Еркін ауылы мен Оңтүстік-Шығыс тұрғын ауданында, сондай-ақ «Сарыбұлақ» пен «Балықты» саяжай массивтеріндегі су мәселесінің қалай шешілетініне де тоқталды.  

Ал жол бойынша, биыл Талдықорған қаласының 235 көшесін                   жөндеуге, күтіп ұстауға 9,6 млрд. теңге бөлініп, белгіленген жұмыстар аяқталған. Алдағы уақытта  Солтүстік-Батыс тұрғын ауданы, 8, 9 және Жастар-1 шағын аудандарынға 55 шақырым жаңа жол салынып, Оңтүстік-Шығыс және Шығыс тұрғын аудандарындағы 19 көшеге күрделі жөндеу жасалады. Сол сияқты ірі жобаларының бірі – құны 17 млрд. теңгеден асатын Шайқорған, Жастар-2 тұрғын аудандарында, Көктал ауылында және Үшінші бөлімшеде барлығы 97 көше кезең-кезеңмен алдағы үш жылда салынатын болады. Облыс әкімі тиісті сала басшылары мен қала әкіміне инженерлік инфрақұрылым және сумен жабдықтау құрылыс жұмыстарына қатаң қадағалау жүргізуді, сондай-ақ, тек қаланың ішкі жолдары ғана емес, шеткі аумақтардағы жолдарды жөндеуді, жол құрылысының сапасын ерекше бақылауға алуды тапсырды.

Облыс әкімі тұрғын үй мәселесіне айқырша екпін түсірді. Бүгінгі күні облыс орталығында тұрғын үй кезегінде 15 мыңнан астам адам тұр. «2015-2021 жылдар аралығында мемлекеттік тұрғын үй қорынан үй беруде жол берілген заңсыздықтар қоғамда үлкен резонанс туғызғанын білесіздер. Тұрғын үй заңнамасын бұза отырып берілген 1218 пәтер анықталды, қазір олардың құжаттарын заңдастыру жүріп жатыр. Сол сияқты бірыңғай республикалық «Кезекте KZ» базасында тізімнен шығып қалған 1426 адамның кезегі қайта қалпына келтірілді. Оған қоса тұрғын үйге мұқтаждар санатында жоқ 755 адам кезек тізімінен алынды. Бұл жұмыс жалғасып жатыр», - деді облыс әкімі.

Жалпы биылғы жылы бюджет есебінен 1558 пәтер берілсе, 2024 жылы 2084 пәтер беріледі деп жоспарланып отыр, соның ішінде «Самұрық-Қазына» қоры 7 үйдің құрылысын аяқтайды.

Бейбіт Исабаев өз сөзінде коттедж қалашығының құрылысына қатысты сот үкімі шығып, енді құрылысты аяқтау үшін ЖСҚ-ға түзету енгізуге бюджеттік өтінім берілетінін айтты. «Қала әкіміне коттежд қалашығының құрылысын қатаң бақылауға алып, келесі жылы толық аяқталуын қадағалауды тапсырамын», - деді облыс басшысы.

Сол сияқты ол бүгінгі күні жеке тұрғын үй салуға қажетті жер теліміне кезекте 45 мыңдай азамат тұрғанын, алайда кезектегілердің бәріне жуық жылдарда инженерлік инфрақұрылыммен қамтылған жер беруге мүмкіндік жоқ екенін ашып айтты.

- Осыған байланысты біз алдымен стратегиялық шешімдер қабылдап, қаланың Бас жоспарына өзгерістер енгізуіміз керек.

Ал әзірше  көп қабатты үйлер салуды жалғастырамыз, - деді Б. Исабаев. Осыған орай қала әкіміне Бас жоспарды өзгерту туралы ұсыныс әзірлеу тапсырылды.

Қаладағы апатты үйлер мәселесі кезең-кезеңімен шешіліп келеді. Бұл жұмысты қала басшылығы келесі жылы толық аяқтауы тиіс.

Сол сияқты қаланы абаттандыру, арық жүйелерін ретке келтіру жайлы да баяндап берді. Әлеуметтік саладағы жаңалықтарды да атап өтті. Мәселен, келесі жылы қалада ересектерге арналған 150 орындық оңалту орталығының құрылысына республикалық бюджетке өтінім беріледі. Ынтымақ ауылында 1200 орынды мектептің құрылысы аяқталып, мектеп қаңтар айында оқушыларды қабылдайды. Сонымен қатар «Жайлы мектеп» ұлттық жобасы аясында Жастар-2 шағын ауданында, Батыс тұрғын ауданында және Көктал ауылында 3 мектеп 2024 жылы салынады.

Оңтүстік-Батыс ауданда облыстық сот ғимараты ретінде салынып бастаған ғимарат 500 орындық емхана ретінде беріледі. Өтенай ауылында дәрігерлік амбулатория салынады.

Сонымен қатар облыс әкімі биылғы маусым айындағы кездесуде қала тұрғындары көтерген проблемалық мәселелер бойынша атқарылған шараларға да кеңінен тоқталып өтті. Мәселен, алдыңғы кездесуде көтерілген 25 мәселенің 12-сі шешімін тапқан, 13 мәселе бойынша жұмыс жүргізілуде. Олардың ішінде «Үйтас» саяжайына газ тарту, №4 и №4а автобус маршруттарының жүру бағытын ұзарту, «Халық қатысатын бюджет» бағдарламасы арқылы Еркін ауылының Б.Момышұлы көшесі мен Көктал шағын ауданында Теректі көшесіне балалар алаңы салу, және басқа да шешімін тапқан мәселелер бар.

Баяндамасын қорытындылаған облыс әкімі қала басшылығына тұрғындардың әлеуметтік жағдайын жақсартып, халықтың әл-ауқатын арттыруға ықпал ететін барлық іс-шаралары мерзімінде, сапалы атқаруды тапсырды.

Кездесу соңында Бейбіт Исабаевқа қаланың 50-ден астам тұрғыны сұрақ қойды. Олардың ішінде сұрақтарын Инстаграм желісі арқылы жазбаша жолдағандар да бар.

Мәселен, Көктал шағын ауданының тұрғыны М. Нұрышев Амангелді көшесінің республикалық трассамен қиылысына бағдаршам қойса деген өтінішін жеткізді. Бұл мәселе бойынша тиісті органдар аталған көше қиылысындағы жағдайға мониторинг жүргізіп, бағдаршам ба, арнайы белгі ме, не қою керектігі туралы шешім қабылдайтын болады.

«Үйтас» саяжай қауымдастығының төрайымы Людмила Расуловна саяжайға елді мекен статусын беру мәселесі тезірек қолға алынса дейді. Жауаптан белгілі болғандай, ол үшін қала әкімдігі алдымен Бас жоспарға өзгерістер енгізіп, бекітуге ұсынуы керек. Бұл жұмыс келесі жылы қузалады. Сондықтан саяжайға елді мекен мәртебесін беру ісінің ауылы алыс емес.

Роза Ақжаркенованың 2-ші және 3-ші топтағы мүгедектердің қаладағы қоғамдық көліктерге төлейтін жолақысына жеңілдік жасау туралы ұсынысына облыс әкімі экономикалық есептеу жасамай бірден жауап берудің қиын екенін айтты. «Жеңілдіктер дегеніміз - бұл жергілікті бюджетке қосымша жүктеме. Сондықтан қалалық әкімдік қанша адамға қанша қаржы жұмсалатынын есептеп көруі керек. Бірден «иә» деп айта алмаймын. Есептеңіздер, қандай мүмкіндіктер бар екенін қарап көріңіздер», - деді Ернат Бәзілге қарата Бейбіт Исабаев.    

Қаланың 54 жастағы тұрғыны Бақыт Мәсімбайқызы жуырда ресми жұмыссыз ретінде тіркелгенін айтып, «Күміс жас» бағдарламасы бойынша жұмыс табуға көмек сұрады. Бұл мәселені шешу облыстық жұмыспен қамту және әлеуметтік бағдарламалар басқармасының басшысына тапсырылды. Сол сияқты тұрғындар қалада көп қабатты үйлердің алдында газгольдерлердің әлі де алынып тасталмағанын айтты. Қала әкімі Ернат Бәзіл әзірге қалада осындай 167 газгольдер бар екенін, оның 70 шақтысы мүлде қолданылмайтынын жеткізіп, оларды демонтаж жасау жоспарда бар және келесі жылы атқарылады деп сендірді.  

Кездесу барысында жол жөндеу, арық жүйесін ретке келтіру, абаттандыру, балалар ойын алаңдарын салу, жабайы сауданы болдырмау, мемлекеттік тұрғын үй қорынан үй алу сияқты көптеген мәселелер көтерілді. Сұрақтардың барлығына заң аясында жауап беріліп, жауапты лауазымды тұлғаларға тиісті тапсырмалар берілді.  

 

Жетісу облысы әкімінің баспасөз қызметі.

Фотосуреттер авторы: Жеңіс Ысқабай

Источник: Акимат области Жетісу