Петропавл қаласында облыстық С. Мұқанов атындағы кітапхананың жанында Солтүстік Қазақстан облысы әкімдігі Дін істері басқармасының Конфессияаралық қатынастарды талдау және дамыту орталығының мемлекеттік әлеуметтік тапсырысы аясында «Радикалды идеологияның ықпалына түскен адамдарды радикалсыздандыру бойынша жұмысқа тартылған теологтарға, исламтанушыларға және мамандарға арналған оқыту тренингтерінің кешені. Оңалту жұмысының заманауи әдістері» тақырыбында екі күндік семинар өтті.

Іс-шара теолог-мамандардың біліктілік деңгейін арттыруға, жұмыста әдістемелік және практикалық көмек көрсетуге, қазақстандық қоғамның дәстүрлі рухани-адамгершілік құндылықтарын қалыптастыруға, діни экстремизмнің алдын алуға, сондай-ақ дін саласындағы мемлекеттік саясаттың негізгі бағыттарын түсіндіруге бағытталған.

Оқыту семинарының спикерлері ретінде республикалық ақпараттық–түсіндіру тобының мүшелері, дін саласындағы жетекші сарапшылар: - Солтүстік Қазақстан облысының бас имамы - Хамзат Әділбеков, «Нұр-Мүбарак» университетінің исламтану кафедрасының PhD докторанты - Сүлеймен Асқаров, Павлодар қаласы, Омар әл-Фаруқ мешітінің имамы – Ақтөре Тұрапбай, оңалту және реинтеграция бағдарламаларының ұлттық сарапшысы - Гүлназ Раздықова,  «Конфессияаралық және өркениетаралық диалогты дамыту жөніндегі Н. Назарбаев орталығының талдаушысы - Дулат Жақиянов,  Павлодар облысының конфессияаралық қатынастарды талдау және дамыту орталығының теологы - Асылхан Батырханов сөз сөйледі.

Оқыту тренингіне облыстың ақпараттық-түсіндіру топтарының мүшелері, аудандар мен Петропавл қаласының ішкі саясат бөлімдерінің басшылары мен мамандары, облыстың құқық қорғау және арнайы органдарының өкілдері, облыстың түзеу мекемелері мен ҚМДБ филиалдарының теологтары шақырылды.

Тренинг барысында қатысушылар радикалды идеологияға бейім адамдармен жұмыс істеудің жаңа әдістерін зерделеп, халықтың деструктивті діни идеологияға қарсы иммунитетін қалыптастыруға бағытталған практикалық дағдыларды үйренді.

Іс-шара соңында қатысушыларға әдістемелік брошюралар таратылып, оқыту семинарынан өткені туралы сертификаттар табысталды.

Материал Солтүстік Қазақстан облысы бойынша

ТҚК аппаратының ақпараты негізінде дайындалды

Источник: Антитеррористический центр Республики Казахстан