Бүгін Жетісу облысының әкімі Бейбіт Исабаев Панфилов ауданында бірқатар маңызды нысандарды аралап, олардың жұмыс барысымен танысты, - деп хабарлайды Жетісу облысы әкімінің баспасөз қызметі.

Жұмыс сапарын «Қорғас» шекара маңы ынтымақтастығы халықаралық орталығынан бастаған облыс басшысы орталықтың қазіргі тыныс-тіршілігіне назар аударды.  

«Қорғас» ШЫХО «Арнайы экономикалық аймағының басқарушы компаниясы» АҚ басқарма төрағасының міндетін атқарушы Ерсін Оразаевтың айтуынша, «Қорғас» ШЫХО облысқа берілгеннен бері екінші багаж терминалы ашылып, онда багаж қабылдайтын 5 пункт іске кіріскен. Соның нәтижесінде қазір орталыққа тәулігіне 5 мыңдай адам кіріп-шығады. Ал бұған дейін бұл көрсеткіш 3,5 мың шамасында болған. Сол сияқты жолаушыларды тасымалдайтын жаңа автобустар сатып алынып, билет беру мен багаж тасымалдау цифрландырылған процеске ауыстырылуда. Облыс әкімі екінші багаж терминалы мен ондағы процестердің атқарылу барысын көріп, цифрландыру арқылы жұмысты бір жүйеге келтіруді одан әрі жалғастыруды тапсырды.  

Белгілі болғандай, орталық аумағында 22 инвестициялық компания жұмыс істеп, 29 жобаны іске асыруда. 2024 жылы тағы 9 жобаға 22 млрд. теңге инвестиция салынып, 750 жұмыс орны ашылмақ. Солардың бірі - «International Castle» ЖШС-ның «Шеберлер қаласы» жобасы. Бірнеше жыл бұрын басталған жоба келесі жылы толық аяқталуы тиіс. Құрылыстың жүргізілу барысын аралап көрген Бейбіт Исабаев нысан иелеріне қолданылып жатқан материалдардың неғұрлым сапалы болуына назар аударуды, ал сапалы салынған дүниенің ұзақ қызмет ететінін айтты. Сонымен бірге «Silk Road Star Co. Ltd» ЖШС-ның «Дала тарихы» көрме кешенінің және басқа да құрылысы жүріп жатқан нысандарды аралап көрді.

Мұнан соң облыс басшысы «Қорғас-Шығыс қақпасы» арнайы экономикалық аймағына атбасын тіреді. АЭА аумағында Құрғақ порт логистикалық және индустриялық аймағы, сонымен бірге  логистика және өңдеу өнеркәсіптері орналасқан. Облыс әкімі солардың бірқатарына бұрылып, жұмыстарымен танысып шықты.

Мәселен, АЭА аумағында «SSA Feed Mills» ЖШС-ның қуаты жылына 60 мың тонна құрама жем шығаруға жететін зауыты 2020 жылдан бері жұмыс істейді. Серіктестік директоры Сергей Намның айтуынша, жүгері, бидай, арпа, соя және басқа да дақылдардан құрама жемнің 20 шақты түрі дайындалады. Кәсіпорында жұмыс істейтін 50-ден астам адамның басым бөлігі – жергілікті тұрғындар. Шикізат ретінде жүгеріні облыс шаруашылықтарынан алса, сұрыпталған бидай Ресейдің Алтай аймағынан жеткізіледі. Зауыт өз өнімдерін отандық ірі фермерлік шаруашылықтарға, соның ішінде шошқа және құс фабрикаларына өткізіп отыр.

Осы орайда Бейбіт Исабаев облыстық ауыл шаруашылығы басқармасының басшылығына:

- Бізде құрама жемді қажет ететін мал бордақылау алаңдары мен тауарлы сүт фермалары бар. Осындай кәсіпорындар мен шаруашылықтардың өзара серіктестігіне дәнекер болу керек, - деді.   

Келесі нысан «Khorgos Tech contraсt» ЖШС-ның перде және басқа да  текстиль өнімдерін шығаратын кәсіпорны болды. Биылғы жылдың наурыз айында іске қосылған тігін кәсіпорны отыз адамды арнайы оқудан өткізіп, жұмысқа қабылдаған. Қазір мұндағы тігіншілер перде, сүлгі, төсек жаймалары, төсек жапқыш сияқты текстильдің барлық түрлеріне маманданған. Жуырда алғашқы өнімдері - 5 мың дана төсек жапқышты Ресейге жөнелткен. Жобаға тартылған инвестиция көлемі - 0,187 млрд.тг. Жобалық қуаты жылына 150 мың жинақ перде тігуге жетеді.

Сол сияқты облыс басшысы металлочерепица, пішінді темір төсеніштер мен штрипстар шығаратын және күн электр станциясына қажетті панельдер құрастыратын зауыттардың да тыныс-тіршілігімен танысты.

Сапар қорытындысында арнайы экономикалық аймақтарға инвестиция тарту, «Қорғас» ШЫХО жұмысын жүйеге келтіру шараларын жалғастыру мен орталық аумағында құқықтық тәртіптің сақталуына қатысты тиісті органдарға бірқатар тапсырмалар берді.

Жетісу облысы әкімінің баспасөз қызметі.

Источник: Акимат области Жетісу