Дін – қоғамдағы маңызды әлеуметтік-мәдени сала. Сондықтан жастардың діни сауаттылығын арттырып, оларды деструктивті ағымдардан қорғау аса маңызды. Осы тақырып төңірегінде Қызылорда облысы дін істері басқармасы «Дін мәселелерін зерттеу орталығы» КММ-нің дінтанушы маманы Олжас Нарымбетовпен сұхбаттасқан едік.

— Олжас Жақыпбекұлы, жат ағымдардың алдын алу үшін не істеу керек?

— Діни сауаттылық – басты мәселе. Кез келген адамның дін туралы алғашқы дұрыс түсінігі болуы тиіс. Жастардың радикалды идеологияға еріп кетпеуі үшін оларды діни ақпаратты ақылмен саралай алуға үйрету қажет. Дін – тек сенім ғана емес, ол мәдениет, өмір сүру салты, қарым-қатынас жүйесі. Сондықтан діни мәселені шешу – тек дін мамандарының ғана емес, бүкіл қоғамның міндеті.

— Білімді, көзі ашық азаматтар да жат ағымға еріп кетіп жатады. Мұның себебі неде?

— Жат ағым өкілдері үшін сауатты бір адамды тарту – мың сауатсыз адамды арбағаннан тиімді. Себебі, беделді немесе жоғары білімі бар адам кейін мыңдаған адамды өз соңынан ертуі мүмкін. Олар әділеттілік іздеген, өзін бағаланбаған сезінген адамдарды ерекше көздейді. Әскери мамандар – қарулы күш ретінде, ғалымдар – радикалды идеологияны насихаттау құралы ретінде пайдаланылады.

— Діни білім алғысы келетін жастарға қандай кеңес берер едіңіз?

— Діни білім алу – маңызды қадам. Бірақ оны тек сенімді, білікті мамандардан үйрену керек. Дінді өз бетінше немесе күмәнді дереккөздерден үйрену адасушылыққа әкелуі мүмкін. Шетелде діни білім алуға ұмтылған жастар алдымен Қазақстандағы оқу орындарында негізін қалап, кейін тәжірибесін толықтыру үшін шетелге баруы дұрыс. Сонымен қатар, қазақтың тарихы мен әдебиетін зерттеу – ұлттық болмысты сақтап, дәстүрлі діни ұстанымнан айнымауға көмектеседі.

— Мазмұнды сұхбатыңызға рахмет!

Балжан Толысбекова Қызылорда облысы дін істері

басқармасы «Дін мәселелерін зерттеу орталығы» КММ-нің дінтанушысы

Источник: Антитеррористический центр Республики Казахстан