Түркістан облысы Терроризмге қарсы комиссияның бастамасы және Қазығұрт аудандық ішкі саясат бөлімінің ұйымдастыруымен ауданға қарасты білім беру мекемелеріндегі мұғалімдердің қатысуымен педагог кадрлардың біліктілігін арттыруға бағытталған семинар-тренинг өтті.

Семинарға ҚМДБ Бас муфти кеңесшісі, стратегиялык талдау және даму бөлімінін меңгерушісі, РАНТ мүшесі Смайыл Сейтбеков және аудандық ақпараттық түсіндіру тобының мүшелері қатысты.

Аталған семинардың мақсаты – аудандық ақпараттық-түсіндіру тобының мүшелері мен мұғалімдердің білімі мен біліктілігін арттыру және өзара тәжірибе алмасу, жастардың экстремизмге қарсы санасын қалыптастыру, діни экстремизм мен терроризмге қарсы іс-қимыл мәселелерінде құқықтық және азаматтық жауапкершілік деңгейін арттыру, Қазақстан жастарын радикалды топтарға айналдыруға жол бермеу болып табылады.

«Экстремизм мен терроризм – қазір қоғамды алаңдатып отырған өзекті мәселелердің бірі. Онымен күресте жастарды қамтып, дұрыс бағыт бағдар беруде мұғалімдердің маңызы зор. Аталған бағытта еліміздің жарқын болашағы үшін аянбай қызмет ету біздің басты міндетіміз»,- деп атап өтті, Смайыл Сейтбеков.

Сонымен бірге, семинар барысында ақпараттық қауіпсіздік, әлеуметтік желілер мен интернет ресурстарындағы ақпараттарды сауатты пайдалану, оларды тарату кезіндегі жауапкершілік пен қауіпсіздік туралы баяндалды.

Кездесу соңында қатысушылар тарапынан қойылған дін саласындағы ең өзекті мәселелер туралы сұрақтарға мамандар толыққанды жауап берді.

Аталған іс-шараға 100-ге жуық қызметкерлер қатысты.

Материал Түркістан облысы бойынша ТҚК

аппаратының ақпараты негізінде дайындалды

Источник: Антитеррористический центр Республики Казахстан