Цифрлық технологиялар өмірімізге дендеп еніп, ақпаратқа қолжетімділік артқан сайын жастардың түрлі идеологиялық ықпалдарға ұшырау қаупі күшейіп отыр. Бұл – бүгінгі қоғам үшін өткір әрі өзекті мәселе.

Жастар – өзінің өмірлік жолын іздеуде, құндылықтық бағдарын қалыптастыруда өтпелі кезеңде тұрған әлеуетті аудитория. Өкінішке қарай, дәл осы шақта олар жалған рухани ұйымдардың, деструктивті діни ағымдардың назарына ілігеді. Бұл ұйымдар өз идеологияларын рухани өсу, шындықты тану, ішкі үйлесім табу секілді тартымды ұрандардың астына жасырып, жастарды сенімге кіріп, санаға ықпал ету жолдарын жақсы меңгерген.

Біз бұл жағдайға жай ғана сенім өзгерісі ретінде қарамауымыз керек. Бұл – терең психологиялық трансформация. Жас адамның айналасындағы ортамен қарым-қатынасы үзіледі, отбасы мен достарына деген сенім азаяды, білімге деген қызығушылық жоғалады. Уақыт өте келе, олар діни көшбасшыға толық тәуелді болады, өз бетінше шешім қабылдай алмайды, ғылыми көзқарасты, дәстүрлі құндылықтарды жоққа шығарады. Мұндай өзгерістер сырт келбеттен бастап, сөздік қор мен мінез-құлыққа дейін әсер етеді.

Бұл – тек жеке тұлғаның тағдырына төнген қауіп емес, бұл – ұлттың біртұтас рухани тұтастығына, мемлекеттің ішкі тұрақтылығына бағытталған қауіп. Өйткені радикалды ұйымдар тек жеке адаммен шектелмейді. Олар қоғамда балама шындық орнатуға тырысады, мемлекеттің негіздерін терістейтін параллель идеологиялық кеңістік құруды көздейді.

Бүгінгі күні бұл проблемаға қарсы кешенді жұмыс қажет. Алдымен, жастармен түсінікті тілде сөйлесуіміз керек. Тыйым салу, қорқыту немесе құрғақ морализм емес – ашық диалог, өмірден алынған нақты мысалдар, логикалық аргументтер маңызды. Жастарды деструктивті ұйымдардың белгілерімен таныстырып, олар мен дәстүрлі дін арасындағы айырмашылықты нақты түсіндіру – басты міндетіміз.

Сол себепті де критикалық ойлау мәдениетін дамыту – негізгі басымдықтардың бірі болуы тиіс. Ақпаратты талдай білу, сұрақ қою, күмәндана білу, әртүрлі дереккөздерді салыстыра алу – бұл кез келген идеологиялық манипуляциядан қорғайтын мықты қалқан.

Сонымен қатар, біз жастар жүрген жерде – яғни әлеуметтік желілер мен мессенджерлерде белсенді болуымыз керек. Бос кеңістікті жалған идеялармен толтырмас үшін сенімді, сапалы, мазмұнды контент ұсынып отыруымыз қажет.

Ата-аналар мен ұстаздар да қырағы болғаны жөн. Жастардың мінез-құлқындағы күрт өзгерістерге мән беріп, олармен ашық әңгімелесу мәдениетін қалыптастырған дұрыс. Егер жағдай күрделене түссе, кәсіби мамандардың көмегіне жүгінген абзал.

Қорытындылай келе, деструктивті діни ағымдармен күрес – бұл жай ғана қауіпсіздік шарасы емес. Бұл – болашақтың тағдыры. Өскелең ұрпақтың сана-сезімін қорғау, олардың рухани ізденісіне дұрыс бағыт беру – баршамыздың ортақ міндетіміз. Ұлттың ертеңі – бүгінгі жастардың рухани иммунитетіне тікелей байланысты.

Әл-Фараби Нұрбекұлы, дінтанушы, Алматы қаласы бойынша діни экстремизм мен терроризмнің алдын алу жөніндегі ақпараттық-түсіндіру тобының сарапшысы

Источник: Антитеррористический центр Республики Казахстан