Атырау қаласына арнайы келген исламтанушы ғалымдар құқық қорғау органы қызметкерлеріне арнайы семинар өткізді.

Исламтанушы, PhD доктор, доцент Қ.Құрманбаев пен М.С.Нәрікбаев атындағы университеттің «Ислам және қазақ құқығы орталығының» басшысы А.Сабдиннің қатысуымен өткен семинар «Дін және құқық: Мемлекет заңдары мен қағидаларының үйлесімі» деп аталды.

Семинардың негізгі мақсаты - құқық қорғау органы қызметкерлеріне дін мен құқықтың өзара байланысын түсіндіру, мемлекет заңдарының дінмен үйлесімін қамтамасыз ету бойынша білімдерін шыңдау, әрі діни радикализм мен экстремизмнің алдын алу үшін тиімді әдістер-тәсілдерін талқылау.

Семинарды Атырау облысы Дін істері басқармасының басшысы Қ.Мусаев ашып, өңірімізге арнайы шақыртумен келген қонақтарды таныстырып өтті. Сондай-ақ, семинардың мақсат міндеттерін нақтылап, бүгінгі жұмыстарына сәттілік тіледі.

Семинарға 50-ге жуық құқық қорғау органдарының қызметкерлері мен облыстағы дінтанушы мамандар қатысты.

Шарада алғашқы баяндаманы Исламтанушы, PhD доктор, доцент Қ.Құрманбаев жасады. Өз сөзінде ислам тарихындағы құқықтық құнды мұралар, теңдік, әділдік мәселесін баяндай келе: «Ислам басшыға бағынуға қатысты мәселеге аса басымдылық берген. Мемлекеттің заңына бағыну, оның құқықтық жүйесін басшылыққа алуды Хақ дініміз міндеттейді. Өйткені, бұл - ғасырлар бойы қалыптасқан, жинақталған тәжірибемен келген жүйе. Сіз бен біздің мақсатымыз - тыныш, бейбіт қоғам орнату. Сондықтан, осы мақсатқа жету жолында жұмыла әрекет ету маңызды», -деді.

Исламтанушы ғалым тақырып аясындағы баяндамасында Хақ дініміздегі мысалдарды келтірсе, келесі сөз кезегін алған М.С.Нәрікбаев атындағы университеттің «Ислам және қазақ құқығы орталығының» басшысы А.Сабдин құқықтық жағына басымдық берді.

Сөз барысында дін мен құқықтың өзара үйлесімі мәселесіне кеңінен тоқталып, қатысушыларға адамның сыртқы іс-әрекетіне әсер ететін әлеуметтік-регуляторлық бес жүйені талдап берді: «Адам осы бес жүйенің біреуімен міндетті түрде өзіне үкім шығарады. Олар: әдет ғұрып, дін, корпоративтік-регуляторлық жүйе, мемлекеттік-құқықтық жүйе. Біз осы жүйелердің аражігін ажырата отырып, мемлекет заңын бұзбайтын, діндар, салт дәстүрді мойындаған жүйелерді жарастыра алуымыз керек»,-деді өз сөзінде.

Семинар барысында құқық қорғау органдарының қызметкерлері дін мен құқық арасындағы үйлесімділік мәселелеріне тереңірек назар аударды. Дінтанушы ғалымдарға сұрақ қою арқылы өзара пікір алмасып, өздерінің ғылыми және тәжірибелік пікірлерін ортаға салды.

Аталған семинардың құқық қорғау органдары қызметкерлерінің кәсіби деңгейін арттыруда маңызы зор болды.

Шараны Дін істері басқармасының қолдауы негізінде «Жәрдем-Атырау» корпоративтік қоры ұйымдастырды.

Атырау облысы әкімдігінің баспасөз қызметі

Источник: Антитеррористический центр Республики Казахстан