Жаңғырту жұмыстары жүріп жатқан Балқаш көліне апаратын автокөлік жолы биылғы жылдың соңына қарай төменгі асфальт жабынымен іске қосылады. Құрылыс жұмыстары толығымен келесі жылы аяқталады. Бұл туралы облыс әкімі Бейбіт Исабаевтың аталған жол құрылысымен танысуы барысында айтылды, - деп хабарлайды Жетісу облысы әкімінің баспасөз қызметі.

«Жол» ЖШС мердігер компаниясы өкілдерінің айтуынша, бүгінге дейін «Алматы - Өскемен» автожолының «Лепсі - Ақтоғай» бағытындағы, яғни Балқашқа апаратын 0-110 шақырымының 35 км толық жасалып бітіп, пайдалануға берілген. Сонымен қатар 35-63 шақырымына асфальт бетон жабынының екінші қабаты төселіп бітті, ал биылғы жылдың соңына қарай асфальттың екінші қабаты салынып, көлік қозғалысына жол ашылады деп жоспарланып отыр. Келесі жылы беткі қабаты мен абаттандыру жұмыстары толық аяқталады. Жол бойында аялдамалар мен дәретханалар қарастырылған. Қазір құрылыс жұмыстары қазір қарқынды жүріп жатыр. Жалпы бұл жобаның құны – 30,4 млрд. теңге. 

Еске салсақ, бұдан бөлек, Лепсіден Балқаш жағалауына апаратын 27 шақырым жолдың құрылысына 4,6 млрд. теңге бөлініп, бұл жұмыстарды «Казстройцентр» ЖШС атқарған болатын. Қазір ол учаске толық іске қосылған.

Осы сапарда Балқаш көлінің 16 шақырдық курорттық-рекреациялық аймағын дамытудың егжей-тегжейлі жоспары таныстырылды. Жоспарды әзірлеген жобалау мекемесінің мамандары шағын демалыс орындары үшін жер 1-3 гектардан, ал ірі инвесторлар үшін 5 гектарға дейін деп белгіленіп отырғанын айтты. Мұнда демалыс аймағына қызмет көрсету орталығы, емдік аймақ, коммуналдық пляж, оқушыларға арналған демалыс лагері, және демалыс аймақтары мен базалары орналастырылады. Мамандардың зерттеуінше, қазіргі кезде Балқаш жағалауына бір маусымда шамамен 52 мың адам демалып қайтады. Ал аймақ жоспарға сай дамытылып, инженерлік желілер толықтай жүргізілсе, маусымына демалушылар саны 452 мың адамға жетеді, ал жақын елді мекен тұрғындары үшін екі мыңға жуық жұмыс орны ашылады деген жоспар бар.

Жағалаудың инженерлік желілерінің құрылысымен айналысып жатқан «Сапа құрылыс 2007» ЖШС-ның директоры Азамат Демегенов ИКЖ жобаларының іске асырылуы жөнінде баяндады. Оның айтуынша, жағалауды дамытуға қажетті су Лепсі өзенінен алынады, су тазарту құрылғысының қуаты тәулігіне 500 текше метр, ал кәріз жүйесінің қуаты тәулігіне 470 текше метр болады. Электр желісі Лепсідегі қосалқы станциядан тартылады. Бүгінде құрылысқа дайындық жұмыстары жүріп жатыр.

Сапар соңында журналистерге берген сұхбатында облыс әкімі Бейбіт Исабаев Балқаш көлі жағалауын дамытудың жоспарлары жайлы қысқаша айтып берді:

- Балқаш көліне дейінгі автомобиль жолының құрылысы – облысымыздың туристік әлеуетін дамытуда аса маңызды жоба. Өйткені туризм – Жетісу облысының әлеуметтік-экономикалық дамуының қайнар көзінің бірі. Саланы дамыту үшін ең алдымен инфрақұрылымдық жобалар  – жол салу, су, кәріз және электр жарығын жүргізу маңызды. Молалының бұрылысынан Балқашқа дейінгі жолдың құрылысы басталғалы біраз болды. Биыл төменгі асфальт қабатымен пайдалануға беріп, келесі жылы беткі қабатын толық жауып бітіреді. Жағалаудағы инженерлік желілердің құрылысына 17 ай уақыт беріліп отыр. Яғни келесі жылдың соңына дейін құрылыс жұмыстары бітуі тиіс. Желілердің қызмет көрсету қуатын алдағы 8-10 жылға жетеді деп жоспарлап отырмыз. Инженерлік-коммуникациялық желілер тартылған соң Үкіметтің қаулысымен бекітілген Балқаштың 16 шақырымдық курорттық-рекреациялық аймағын игеруді бастаймыз. Инвесторларды тарта отырып, 9 км оң жағалауын бірінші кезекте, сол жағалауындағы 9 шақырымды екінші кезекте - екі кезеңмен дамытамыз. Сөйтіп Балқаштың жағалауында заманауи демалыс орындары, туристік базалар орналасады. Алакөлмен салыстырғанда Балқаштың табаны құм, әлдеқайда саяз, ауа райының қолайлы болуына қарай мұнда маусым айынан бастап 3 ай шомылуға болады. Балқаш жағалауын дамыту жақын жатқан елді мекендер тұрғындарының жұмыспен қамтылуына, халықтың демалысына, кәсіпкерлердің бизнес жүргізуіне пайдалы болады. Сондықтан бұл жобаның мультипликативті тиімділігі жоғары деп есептейміз, - деді Б. Исабаев.

Жетісу облысы әкімінің баспасөз қызметі.

Фотосуреттерді түсірген: Жеңіс Ысқабай

Источник: Акимат области Жетісу