2024 жылдың 9 қазанында Қазақстан Республикасы Ұлттық қауіпсіздік комитетінің (ҰҚК) Ақтөбе облысы бойынша департаменті радикалдық идеологияны жақтаған кәмелетке толмаған азамат Н.А.А.-ның заңсыз әрекетін тоқтатты.

Тергеу мәліметтеріне сәйкес, Н.А.А. зайырлы қоғамға төзімсіздік танытып, «WhatsApp» және «Telegram» мессенджерлері арқылы діни экстремизм мен терроризмге үгіттейтін материалдарды таратумен айналысқан. Бұған дейін оған қатысты бірнеше профилактикалық шаралар жүргізілгенімен, олар оң нәтиже бермеген.

Құқық қорғау органдарының мәліметінше, Н.А.А. Қазақстан Республикасының Қылмыстық кодексінің 256-бабының 2-бөлігі – «Терроризмді насихаттау немесе терроризм актісін жасауға жария түрде шақыру» бойынша күдікке ілініп, заң аясында құрықталған.

Жедел тергеу шаралары барысында оның тұрғылықты мекен-жайына тінту жүргізіліп, нәтижесінде 1 смартфон мен 3 діни заңсыз әдебиет кітаптары тәркіленді.

Осы оқиғаға байланысты сот процесі 2025 жылдың 28 қаңтарында өтті. «Кәмелетке толмағандар істері жөніндегі соттың» шешімімен Н.А.А. кінәлі деп танылып, 3 жыл мерзімге бас бостандығынан айырылды.

Қазақстан билігі діни экстремизм мен терроризмге қарсы күресті күшейтіп, әсіресе жастар арасында радикалды идеялардың таралуының алдын алу мақсатында белсенді жұмыстар жүргізуде. ҰҚК мен құқық қорғау органдары азаматтарды заңға қайшы әрекеттерден сақ болуға шақырып, экстремистік мазмұндағы ақпаратты тарату мен насихаттаудың ауыр салдары болатынын ескертеді.

Жастар мен ата-аналарға интернет кеңістігінде таралатын діни материалдарға мұқият қарауға кеңес беріледі. Күмәнді ақпаратты байқасаңыз, құқық қорғау органдарына немесе арнайы қызмет өкілдеріне хабарлауыңызды сұраймыз.

Материал Ақтөбе облысы бойынша ҰҚКД

ТҚО бөлімі ақпараты негізінде дайындалды

Источник: Антитеррористический центр Республики Казахстан